domenica 20 ottobre 2019, Aggiornato alle 22:40
Home > CRONACA, POLITICA E ATTUALITÀ > Ghestires e marcas ogales pro sos barratzellos cun su Disciplinare aprobau como dae sa Regione

Ghestires e marcas ogales pro sos barratzellos cun su Disciplinare aprobau como dae sa Regione

 

CASTEDDU – Sos barratzellos an’aere ghestires e istemas ogales in totu sa Sardigna. L’at istabiliu cussu chi venit mutiu Disciplinare, aprobau sas dies colas dae sa Regione, cun d’unu decretu frimau dae s’assessores de sos Entes locales, Cristiano Erriu. Sa resone de undu est de achere a manera chi su corpu de sos barratzellos si presentede in manera ogale in totu su territoriu fintzas in cussos chi sunu sos signos e sa vestimenta, in manera de essere distintu e riconnotu comente tale. Sa notissia l’at su matessi assessore Erriu, durantes un’atopu cun sos giornalistas, chi s’est tenniu in sos locales de su Cussizu regionale. Si tratada de regulas distintas chi pro sa prima vorta venini istabilias pro s’atividade de su corpu de vigilanza, chi comente est cosa notoria achede un servitziu contro sa ura de su bestiamene, ma puru a benefitziu de su rispetu de s’ambiente (sos buscos, sos monumentos anticos). Duncas dae como a innantis, totus sas cumpantzias sarda an’a impreare una divisa a cumone, siada comente zenia de pantalones e zuba e siada comente colore. Attacaos a su ghestire sa marca de su corpu e sos ateros signos, a comintzare dae sas mustrinas pro distinghere su gradu de su barratzellu: s’est su capitanu o una guardia ordinaria. Colores e signos chi an’a essere presentes purus in sas veturas chi venint impreas pro su servitziu.

In Sardigna operana in su presente chentusessanta cumpantzias de barratzellos, cun oltras a chimbemitza e 200 pessones impignas die pro die. Cumpantzias naschias a daintro de sa comunas, cun sas cale mantenere unu ligatzu pro medas impignos e chistiones, mesche pro cussas ligas a sos raportos cun sa Regione. Su sustenniu economicu de prus importu difatis est propriu cussu de sa Regione, chi in s’urtimu annu at postu a un’ala pro s’atividade afurrriu a batos miliones e mesu de euros. Tantos chi sunu istaos dividios pro una parte tra totus sas cumpanzias, in manera ogale. Pro un’atera parte daos in raportu a cussa chi est istà s’opera chi cada cumpanzia at atu durante s’annu. Cussu de sos barratzellos est un corpu de vigilanzia anticu. Notissias de cussa atividade sunu presentes già in sas normas de sa Carta de Logu, chi est de sue batordighi seculos apustis de Zesu Cristos, de su zudice Mariano IV de Arborea e metzorà dae sos itzos, Ugone III e sa zudichessa Eleonora, a su cumandu de su zudicau chi aviat sede in sa tzitade chi come est Aristanis, e arribadava comente cuntrollu fintzas a sa Barbagia. Sunu montovaos, comente presentzia e atividade, puru in sos istatutos anticos de Zazzari, sa prima comuna libera a naschire, apustis de sa ine de su zudicau de Torres, cando semus galu in sue treghi seculos.

Francesco Pirisi

© Tutti i diritti riservati

Lascia un commento