Sa dimanda de sos grupos de s’opositzione de che moere s’ingarriga a su presidente Fabrizio Beccu est s’argumentu de su Cussitzu cumonale de Nugoro, chi si reunidi martis 23 de Santu Gavini, a mantzanu. S’appellu de sos cussitzeris est pro sas deghe. Su puntu, chi est su solu preventivau in sa reunione, ad’a essere detzisu cun su sistema de su votu secretu, cus sos cussitezeris chi ana a marcare di un’otzu de papilu s’ischerta issoro. Pro aprobare sa dimanda (mozione di sfiducia, su numene distintu) est netzessariu unu votu in prus de sa metade de sos cussitzeris presentes. Votu in prus chi diada depere essere garantiu dae parte de sos grupos chi sustenene s’amministratzione de su sindigu Andrea Soddu e de sos cale achede parte puru Beccu. Presidente chi pro andare bene sa cosa si diada depere però votare pur’issu. Totu est de osservare in su mamentu de sa reunione. Siada ca cun su votu secretu non si podede aere mai sa sicurantzia dae primos, siada ca bastada chi manchede, pro calesisiada de resone, unu cumponente de s’assemblea (in custu casu de sa parte de sa maggiorantzia) chi sas cosa podene piccare una pinnica diferente.
Sa cuntierra tra sos grupos de oppositzione e su presidente de su Cussitzu, Beccu, non est rechente, ma in sos urtimos tempos est diventia prus orte. Mescamente durante su cussitzu de Capidanni, cando su sindigu Soddu ada ritirau sa delibera pro sussos chi venini mutios gli “equilibri di bilancio”, cun s’ischerta de l’ispostare a un’atera data. Sos cussitzeris ana cuntestau a Beccu su vatu de arede deretu apustis cuntzau sa reunione, chenza lis dare sa paragula pro faeddare in s’aula. Sos tempos – cussideraos non secunde regula – de cussigna de sos documentos primos de sos cussitzos, sun’istetios un’atera resone de sa contrariedade a Fabrizio Beccu.
Dae parte sua, su presidente, mesche in supra de sos fatos de sa reunione cuntestà, ca cuntza chene discussione in s’argumentu prepostu, ada rispostu chi su puntu chi’idi cantzellau e duncas pro cussu mamentu non s’inde depiada faeddare prus.
Francesco Pirisi
