lunedì 13 luglio 2020, Aggiornato alle 11:32
Home > CRONACA, POLITICA E ATTUALITÀ > Su giogu in Sardigna

In Sardigna, in su tempus coladu, sa gente fiat pòbera meda e dinari pro comporare giogos a sos pitzinnos non nde teniat. Tando sos giogos los faghiant cun su chi teniant, isvilupende sa fantasia e sa manualidade.

Sos pitzinnos imitaiant a sos mannos, esertzitende·si cun su giogu a praticare sas atividades chi sa vida de cussu tempus richiediat: sas fèminas giogaiant a fàghere sas meres de domo, a ninnare pitzinnos, a fàghere casu e a còghere pane; sos òmines faghiant giogos de balentia, chirchende de si fàghere fortes e àbiles.

Onni cosa podiat serbire comente giogu e pro giogos diferentes: unu pùngiu de lande podiat èssere proiètile pro sa gherra, bardufuledda, masone de bacas o muntone de pedra pro tuponare unu niu de formiga. Faghende·li un’istampa e ponende·nche a intro unu fustigru su lande podiat èssere finas una pipa, e tando su pitzinnu chi si lu poniat in buca comintzaiat a imitare a sos betzos, tzopighende e brighende a sos àteros pitzinnos chi fiant burdellende.

Ma in antigu sos pitzinnos si faghiant òmines in pagos annos: a oto-noe annos comintzaiant a traballare paris cun sos genitores, pro su pagu chi podiant fàghere: sas fèminas tentaiant a sos frades minores e faghiant su gustu cando sa mama nche fiat in campagna, sos òmines andaiant a su sartu paris cun su babbu, e a bortas nche colaiant meses intreos sena torrare a bidda, tentende su bestiàmene.

Gianfranca Piras

© Tutti i diritti riservati

Lascia un commento

error: Content is protected !!
× CLICCA PER CONTATTARCI