Pro sos esproprios de Funtana Buddia sa Comuna pedit chi ventzat suspesa sa detzisione de su zudice

Sonia

Pro sos esproprios de Funtana Buddia sa Comuna pedit chi ventzat suspesa sa detzisione de su zudice

martedì 01 Gennaio 2019 - 17:56
Pro sos esproprios de Funtana Buddia sa Comuna pedit chi ventzat suspesa sa detzisione de su zudice

Il Comune di Nuoro (foto S.Novellu)

NUGORO – Sa comuna at atu ricursu contra a sa sentèntzia de sa zustìssia chi l’at cundennà a pacare oltras a tres miliones de euros pro un espropriu de terreninos in su vichinadu de Funtana Buddia, atu paritzos annos achede. Pro prima cosa at dimandau a su tribunale de suspendere s’atu, in manera de andare apustis a torrare a esaminare totu canta sa chistione. Cuntierra dae tempus in manos a sos zudices, tantu chi si nde sun ocupaos siat cussos italianos (su tribunale de Nugoro e sa Corte de Apellu de Tàtari), siat cussos de sa zustissia de s’Unione Europea, cun detziones chi ant sèmpere dau resone a sos proprietarios, a sos cale sun istetios esproprios sos tretos de terra, impreaos dae sa comuna pro costruire istradas e domos. Depidu, chi apustis de varias detzisiones, at superau sos tre miliones de mesu, ca a su tantu netu de su valore postu dae sos peritos a su bene, si sun atzuntos s’interessu e sas ispesas de sa zustissia, chi comente regula sun a garrigu de chie perdet sa lite. Dinare chi pro detzisione de su tribunale europeu est istau pacau a sos proprietarios dae s’Istadu italianu, chi como lu cheret issecus dae sa comuna de Nugoro. Tantu chi a su municipiu dae s’annu colau est arribà sa cartella cun sa pacamenta imbià dae s’esattore. In mesu a sa lite, cun sa varias udientzias, vat’apiù fintzas sa detzione de cussu chi si mutit arbitru (comente un’omine ‘e mesu tra sas partes), sèmpere cando sa chistione it in manos a sa zustissia. Sa proposta de cust’urtima pessone però non est istà atzetà dae s’amministratzione cumonale, chi est andà dainnantis in sa lite. Ma a sa ine s’unicu resurtau est de àere atu creschere su depidu. S’urtima isperantzia est como su ricursu novu, chi at a èssere detzisu s’oto de ghennarzu. S’idea de sa comuna est de otennere un’iscontu, ca in supra de su diritu de sos proprietarios de èssere riconnotu su valore in dinare vat pacu ite cuntestare e peleare.

Francesco Pirisi

© Tutti i diritti riservati

0 commenti

Lascia un commento

Il tuo indirizzo email non sarà pubblicato. I campi obbligatori sono contrassegnati *

Commenta
Sostieni l'informazione libera e indipendente di Cronache Nuoresi