NUGORO – Mamentu de amichentzia prommore de sas eminas sapadu bortaedie, 29 de Nadale, in sos locales de su sotziu “Mancaspazio”, in Nugoro, in sa via della Pietà, a su numeru 11.

Sa casione de sa reunione est cussa de abistare sa mustra cun operas inuve si contada cun sas pinturas sa vida e su mundu de sas eminas. Sas operas presentes sun de Giuseppe Biasi, Gavino Tilocca, Melkiorre Melis, Maria Lai, Emilia Palomba, Salvatore Fois, Antonello Cuccu, acumpanzas dae sos ozetos tribagliaos dae sos artigianos de sa buteca Terrapintada.

Sapadu cun sos bisitadores s’at a tratare mescamente de s’atividade de su sotziu Onda Rosa (in italianu, Centro Antiviolenza Onda Rosa), chi operat in Nugoro dae paritzos annos, pro sustennere sas eminas in dificurtade, mescamente pro sas suferèntzias patias in sas famiglia matessi, tantas bortas comente cusseguèntzia de su maluachere de maridos e cumpantzos de vida.

De signolare chi durantes sa serada s’at a podere comporare cun chimbe euros unu libru, pro dare unu contributo a su tzentru nugoresu chi s’est picau s’impignu de intervennere e dare un’atzudu cada borta chi una eminas est in periculu o non resesit a s’irvoligare dae una dificurtade chi la podet binchere. S’atopu est pro sas ses (ore 18).

Francesco Pirisi