Mamentos de ispetàculu pro sos ptzinnos e fintzas licanzas pro un’assatzu in pratza tra sos atopos de su programma de Pasca ‘e Nadale promoviu dae s’amministratzione cumonale.

Si comintzada oje, sapadu 22, e si sighit dominica 23 de Nadale, cun paritzas atividades preventivas tra su Cursu e sos zardinos de sa pratza Vittorio Emanuele.

Pro s’allegria de sos prus minores ant a essere in pratza sos zocalistas e còmicos de su sotziu “Un Chapiteau Parapluie”, cun brullas e provas de abilidade. Tra sas atividades distintas, sapadu bortaedie, a sas ses (ore 18), est preventivau s’ispetàculu “Hope hope hoplà”, prudotu dae su Teatro del Sottosuolo, chi presentada sa copia I nipoti dei Bernardone, duos omines de arte de sa zenia de sos clown. Mentras dominica, a sas chimbe e mesa (ore 17,30), s’ispetàculu sèmpere de zocos e iscenas alligras “Juggler-One Man Show”, atu dae Andrea Tiana.

Sa Pasca ‘e Nadale est mamentu puru pro pompiare cun prus interessu a chi non istat bene, o pro ca mancat sa salude o abbortas, e sèmpere de prus in custos tempos, fintzas sas cosas minimas pro campare. Si nd’at a faeddare dominica mantzanu, in sos Zardinos, durantes da esta de sa solidariedade. Ant a èssere sos omines de sos varios sotzios de volontariau a contare a sos tzitadinos difucrtades e impignos pro parare fronte mesche a sas peleas de chie istat pejus.

Primas de cuntzare, “Nuoro street food” est s’atera atividade preposta a sa comunidade, sèmpere in sa pratza Vittorio Emanuele. Mamentu in su cale ant’a essere presentau e at’assatzare cussu chi venit mutiu “cibo di strada”, paris cun sa birra locale o artigianale, comente est connota e oramai puru preposta in sas butecas.

Francesco Pirisi