martedì 15 ottobre 2019, Aggiornato alle 12:52
Home > CRONACA, POLITICA E ATTUALITÀ > In chimbe si proponent a su cuvrennu de sa Regione

In chimbe si proponent a su cuvrennu de sa Regione

A s’elencu si diat dèpere atzunghere su zudice Ines Pisano

CASTEDDU – Sas eletziones “primarias” sas dies colas de su Pds, Partito dei Sardi, ant aumentau a chimbe sos candidaos a s’ingarriga de guvernadore preventivaos pro sas eletziones de frearzu a sa Regione. S’urtimu est propriu Paolo Maninchedda, secretariu de su Pds, chi est resurtau su prus votau in sa prova chi su partzidu matessi at atu pro su tramite de s’istrumentu de Internet. Sos ateros candidaos a cuvrennare sa Regione, in custu casu già sicuros, sunt Massimo Zedda, pro su tzentru-sinistra, Cristian Solinas, pro su tzentru-destra, Andrea Murgia, pro Autodeterminatzione, e Francesco Desogus, pro su grupu politicu Cinque Stelle, chi ammentamus est a su cumandu de su guvenu italianu paris cun sa Lega de Matteo Salvini. Sempere in su caminu chi zùchede a sas eletziones regionales de frearzu vest sa naschida de su partzidu “Sardi Liberi”, undau dae Mauro Pili, de su movimentu politicu Unidos, e Angelo Carta, cussizeri regionale de Durgale, chi at lassau su Psd’Az pro cuntrastos cun sos diritzentes. Diferentzias creschias in su mamentu in su cale su partzidu at atu s’acordu cun sa Lega pro sas eleztione de marzu pro su parlamentu. Como bisontzat de viere si su grupu novu s’at a presentare a sa sola, o detzidit de si ponnere a cumone cun ateros grupos, proponende unu candidau guvernadore chi valet pro totus. S’elencu de sos numenes però paret non si depat frimare a sas pessones montovas. Veste difatis sempere s’idea de si presentare cun d’una lista propria dae parte de Ines Pisano, zudice de sa zustìssia amministrativa (su tribunale est mutiu Tar) in su Lazio. Paret detzisa a si presentare e acollire sas frimas, chi sunt netzessàrias cando si tratada de grupos (o partzidos) chi non sunt presentes in su cussizu de sa Regione.

F.P.

© Tutti i diritti riservati

Lascia un commento