NUGORO – Sa chida colà est istau presentau dae parte de s’Assl (Area socio sanitaria di Nuoro) su Pal, Piano attuativo locale, chi ada valididade pro tres annos. S’atopu s’est tenniu in sa sala de sas reuniones de s’ispidale San Francesco, in Nugoro. A picare s’impignu sa Cuferèntzia de su territoriu pro sa sanidade chi est cumposta dae sos amministradores de sas Comunas, cumandà dae su sindigu de Birori, Silvia Cadeddu. Pro s’Assl (chi ammentamus achede parte de s’Ats, s‘azienda regionale) ata presentziau e presentau su pianu sa diretrice Grazia Cattina. Sos sindigos non sun’istetios però totu in d’una idea cun s’azienda. De sos deghennove presentes, in supra de sas cimbantaduas comunas de su territoriu, 10 ana dau votu contrariu. Sos ateros nove si sunu astennios dae su zudìssiu. Su pianu est’imperriau in su propositu de metzorare sos servitzios de sa sanidade in su territoriu. Prima ‘e totus cun sos servitzios de cussas chi venivi mutias Case della salute (sos poliambulatorios de su tempus passau). E, paris, cun su refortzu de s’atividade ata diretamente in sas domos de sos malavios (la medicina territoriale, in su limbatzu distintu), con sos servìtzios pro prevennere sas maledias, a comintzare dae cussu mutiu “screening dei tumori”, atividade de cuntrollu suspesa dae s’annu colau. Atera cosa, sempere ata presente dae malavios e sotzios chi los difendene, sas mezorias in sa curas a s’internu de sos ispidales. In sundu de su sacu, sa volontade – chi tzertu deped’essere posta in pratica – est de achere a manere chi cadaunu potzada achere afidamentu in supra de s’assistèntzia cumpreta e adata a sas netzessidades. Sa resone est antica, ma como sind’azunghede una nova, podimus narrere. L’at’ ispiegà Grazia Cattina: «Su territoriu de s’Assl est mannu e pacu abitau. Sunu creschende de numeru sas pessones chi ana prus de sessantaghimbe annos e comente cusseguèntzia sas maledias cronicas, pro sas cale bata bisonzu de un’atentzione distinta e a sa sighia». Tra sas novidades puru s’esperimentu de programmas de curas e de atividades pro prevennere sas maledias. Tra sos cale cussos mutios “cure simultanee”, “paziente con dolore”, “paziente con demenza”, “paziente con Parkinson”. In su matessi tempus ana at’a essere rinnovà un’atividade pro sighire in totus sos mamentos (de sa vida e de sa maledia) sas pessones afritas dae sa diabeta e dae su male a sos ciumones, connotu comente broncopneumopatia. Cust’urtimu, unu servìtziu de refortzu a sas curas ordinarias chi pro como interessada solo sos malavisios de su territoriu de su distrettu de Nugoro.

Francesco Pirisi

© Tutti i diritti riservati