NUGORO – Sos buscos e sas ateras zenias de campos sunu su bene de prus valore de sa Sardigna, de cusservare e de nde achere istrumentu de richesa puru economica. Su cuntzetu est’istau ammentau eris, lunis 19 de Sant’Andria, durantes s’inauguratzione de s’annu forestale, chi s’est tennia in Nugoro, in sa sala de sa Camera cummerciu. Ana picau parte, e sun’intervennios cun d’una relata, sas assessoras de sa Regione, Donatella Spano, chi cuvrennada sa materia de s’Ambiente, e Barbara Argiolas, titolare de se su setore turisticu. Paris cun issas, Giuseppe Pulina, chi est s’amministradore de s’agentzia Forestas. Dae parte de s’assessora Spano sas iformatziones in supra de su cuvrennu de sas forestas, chi assumana a unu milione e 200mitza etaros. «Amus atu tantos interventos pro cusservare su buscu e lu metzorare. Su bene est mannu e de importu, si si pessada chi non b’est s’ogale in sas ateras regiones de Italia, comente tantu in etaros. S’impignu de ponnere in atu como est cussu de achere naschire e creschere atividades de impresa, de produtos e servitzios, ligas propriu a sos buscos». Argumentu tratau puru dae s’assessora de su Turismu, Barbara Argiolas. Su resonamentu suo est partiu dae sa letze in supra de su turismu, aprobà in su 2017, a da’intro de sa cale est istà forma sa Rete escursionistica della Sardegna (Res): «Un’istrumentu novu pro refortzare su setore, cun atividades de achere acumone cun cussa de sa rete mutia dei Borghi autentici e de s’atera de sos caminos de sa ide cristiana, ligaos a sos santuarios».

S’atera cosa autenticà, galu dae Donatella Spano, non est de prus pacu valore a cufrontu de sa prima, apenas contà. Atenede a s’importu chi ana sos buscos pro garantire prus istabilia a su tempus e minimare sos dannos de traconarjos e fintzas de sa sicagna. S’assessore Spano: «Amus frimau un’accordu cun ateras regiones chi ciaritzana a su mare Mediterraneo, propriu pro istudiare e impreare sas menzus maneras de cusservatzione de su territoriu». Sa die de apertura de s’annu forestale est istà organitzà cun s’impignu de s’assessorau regionale de s’Ambiente, paris cun su Corpu de sos forestale, s’agenzia Forestas e s’universidade de Zazzari, chi in Nugoro at’apertu oramai dae 25 annos e passa su cursu in Scienze Ambientali e Forestali. Durantes sa cuferèntzia sun’istetios puru daos duos riconnoschimentos. Su primu a Gavino Diana, dirizente nugoresu, chi pro varios annos ata cumandau s’ente se sos forestales. S’ateru a Graziano Nudda, fintzas a s’annu colau diretore de sa Protezione civile de sa Sardigna.

Francesco Pirisi

© Tutti i diritti riservati