sabato 4 luglio 2020, Aggiornato alle 18:43
Home > CRONACA, POLITICA E ATTUALITÀ > Sos pitzinnos in su mundu de eris

 

Finas a binti annos como in sas biddas sos pitzinnos minores nche colaiant su prus de sa die in sa carrera, gioghende e currende.

Su pitzinnu no aparteniat a su babbu e a sa mama ebbia, ma fiat de totu sa bidda, e in onni carrera b’aiat ogros chi lu tentaiant e gente chi fiat pronta a li ghetare sa manu si b’aiat perìgulu o a lu brigare si faghiat dannu.

Su pitzinnu fiat seguru, si moviat lìberu in onni carrera, faghiat sos cumandos a totu su bighinadu e podiat intrare in onni domo, fintzas in sas de sos inimigos de sa famìllia.

Cando sos balores antigos de sa bidda traditzionale ant lassadu su campu lìberu a una modernidade interpretada comente autoreferentzialidade, sa bidda no est pàrsida prus unu perlongamentu de sa domo ma unu mundu estràneu, e sa bida est cambiada.

Oe sos pitzinnos nche colant su prus de su tempus o paris cun sos adultos (chi lis organizant su tempus e, a dolu mannu, sos giogos) o in antis de sa televisione.

Paret chi su giogu ispontàneu de su pitzinnu siat tempus pèrdidu, e chi su mundu chèrgiat connotu, interpretadu e analizadu dae pitzinnia, sena lassare campu a sa fantasia e sa creatividade.

Ma forsis sos giogos pòberos de una borta prenaiant su mundu de sos pitzinnos de isperàntzia e de bisiones, e a nche lis furare custas cosas est a lis lassare unu bòidu chi sa tecnologia moderna no at a pòdere mai prenare.

Gianfranca Piras

© Tutti i diritti riservati

Lascia un commento

error: Content is protected !!