Tratas de Etruscos in sas costeras de Terranoa. Paret chi siant de su sèculu IX in antis de Cristos, e las ant agatadas in s’isuledda de Tavolara.

Segundu sos archeòlogos, non si podet esclùdere chi b’apat àteros insediamentos villanovianos in Gaddura, bidu chi Gaddura e Etrùria sunt pròpiu a cara a pare e chi sos tzentros mannos (Populònia, Vetulònia, Vulci, Tarquinia) naschent pròpiu in sa prima edade de su ferru, chi est s’edade chi bidet sa nàschida finas de sos gigantes de Monte Prama.

«Ischìamus de sos cummèrtzios intre nuràgicos e etruscos, ma finas a oe non tenìamus documentada sa presèntzia de una comunidade etrusca chi esseret bìvida in Sardigna. – narat s’archeòlogu Francesco di Gennaro – Duncas custa est una novidade manna chi nos agiudat a connòschere mègius sos raportos intre sas duas partes de su mare Tirrenu in tempus preistòricu».

Si bidet duncas chi sos Etruscos de sa prima edade de su ferru (sèculu 9-8 in antis de Cristos) fiant bonos navigantes. Lu bidimus finas dae sas rastas in sa lìnia de costa de Làtziu setentrionale e de Toscana.

Su subrintendente Francesco di Gennaro e su responsàbile de zona Rubens D’Oriano sunt istudiende sos resurtados paris cun Paola Mancini chi at fatu sos iscavos in su 2011 e 2013.

© Tutti i diritti riservati