Sunt prontos àteros 16 lotos (in totu 792 ètaros) de su progetu “Terra ai Giovani” de sa Regione sarda. Su progetu, inauguradu dae sa Giunta Pìgliaru in su 2016, cheret agiudare s’inserimentu de sos giòvanos in agricultura e torrare a dare produtividade a sas terras isbandonadas.

S’annu coladu s’agentzia Laore, chi ponet in òpera s’initziativa, aiat assignadu 10 lotos in S’Alighera, Tàtari, Serramanna, Biddesorris, Biddaramosa, Ùssana e Donori.

Ocannu sas amministratziones interessadas sunt 13: S’Alighera, Arborea, Arbus, Gonnosfanàdiga, Luras, Maracalagonis, Marrùbiu, Prammas, Santu ‘Asili ‘e Monti, Santuidu, Serramanna, Silìcua e Biddesorris. Intre sas propiedades postas in sos bandos b’at finas duos sitos chi finas a pagu tempus a como fiant de sos militares: Silìcua e Biddesorris.

Podent fàghere domanda sos giòvanos chi tenent prus pagu de 40 annos, chi ant a tènnere sos terrinos allogados pro 15 annos a tassu agevoladu.

«Semus faghende de totu pro creare ocupatzione pro sos giòvanos. – narat s’assessore a s’Agricultura Pier Luigi Caria – Custu est unu progetu chi torrat a pònnere in produtzione giai 1.500 ètaros e chi dat oportunidades de traballu a sos giòvanos».

Gianfranca Piras

© Tutti i diritti riservati