Finas Laura Boldrini at apretziadu su modellu isperimentale “Nughedu Welcome”, ideadu dae sa sotziedade Nàbui e sustènnidu dae su Comune de Nughedu (provìntzia de Aristanis) pro chircare de pònnere remèdiu a su perìgulu de ispopulamentu.

Nughedu Welcome cheret dare un’isperàntzia a custa biddighedda de 500 abitantes pro mesu de unu turismu de identidade, sostenibilidade, biodiversidade. Un’esperièntzia noa, sinnalada dae Legambiente in su volùmene “Alla scoperta della Green society” a cura de Vittorio Cogliati Zezza, chi est istadu presentadu in sa sala Nilde Iotti de sa Càmera in Roma e chi faeddat, comente at naradu sa presidente Boldrini, «de gente impignada a cambiare su mundu» e de unu modellu de isvilupu nou.

«Dae sos datos de sa Regione, Nughedu arriscat de isparire dae inoghe a 60 annos – narat su sìndigu Francesco Mura — e custa est sa risposta nostra a sa crisi demogràfica. Amus comintzadu unu caminu chi at dadu giai sos resurtados, ca in sos ùrtimos 18 meses amus tentu 425 òspites».

Rosa Spiga, presidente de s’assòtziu Nughedu Welcome, est cuntenta meda: «Cherimus mustrare chi finas sas biddigheddas sarda podent tènnere unu produtu de livellu artu — at naradu — e custu produtu est in intro de sas domos de sos abitantes suos».

Gianfranca Piras

© Tutti i diritti riservati