In sas tzitades de totu sa Sardigna s’Annu Nou si festat cun nùmenes connotos de sa mùsica.

Casteddu, chi at torradu a propònnere su “Capodanno diffuso”, proponet mùsica e ispetàculos chi ant animare su Bastione de Santa Rughe, Castello, su parcu de sa Bidreria betza de Pirri e pratza Santu Giagu in su cuarteri de Villanova. In pratza Yenne s’at a fàghere su cuntzertu de Malika Ayane.

Sos terranoesos ant a isetare su 2018 paris cun su rapper e cantautore J-Ax. In Casteddu sardu bi sunt Elio e le Storie tese, cun ispetàculu pirotècnicu in su Casteddu Doria a mesanote.

In Tàtari Piero Pelù e sos Bandidos pro una note rock e in S’Alighera Samuel (frontman de sos Subsònica) e sos Ofenbach chi faghent in sa tzitadina catalana s’ùnica tapa italiana de sa tournée issoro.

In Santu Diadoru si podent ascurtare sos Modena City Ramblers e in Lungoni (Santa Teresa di Gallura) Pino e gli Anticorpi.

Pro chie imbetzes cheret cosa diversa, in su Teatru Màssimu de Casteddu b’at unu bellu programma de mùsica, ispetàculu e coghina de autore intituladu “Annu nou fest”.

Duncas si podet seberare intre tantas cosas, bastat de rispetare sas ordinàntzias de sos sìndigos, chi ant afortigadu sas mesuras de seguresa cun proibitzione de essire a giru cun bidru o latinas e divietu de isparare coetes.

Gianfranca Piras

© Tutti i diritti riservati