NUGORO – Su cussizu cumonale in sa reunione de zovia treghi de Nadale at approbau sa delibera de cussos chi sunu mutios “equilibri di bilancio”. In paragulas fatziles est unu cuntrollu pro atzertare si sas intradas e sas essidas de s’ente sunu sempere paris, chentza chi un cumponente pendat a un’ala e s’atera a sa banda contraria. Sa delibera at apiu su botu de cussensu de sos treghi cussizeris de sa Maggiorantzia, chi sustenit su sindigu Andrea Soddu. Mentras ant botau a contrariu sos grupos de s’opositzione, chi ponet paris diferentes curentes politicas: dae sa Lega, cun Pier Luigi Saiu, a su Pd, de su cale achet parte su sindigu vetzu, Alessandro Bianchi. Sa delibera est arribà a su votu in su cussizu cun meda retardu. Sa letze disponet difatis chi andat aprobà intro a su 31 de trivulas, propriu ca si tratada de autenticare sa situassione de sos contos de su bilanciu a metade annu. Sa resone de su ritardu in sas paragulas de su sindigu: «S’idea it de l’aprobare primos, e difatis già in capidanni aviamus preventivau su votu in su cussizu. Ma vit su parrere a contariu de sos revisores, chi pediant de adempiere primos a su votu pro sos contos de su 2017 e a fachere su controllu in supra de cussos mutios “residui”, sa diferentzia tra cantu sa comuna depede a entes e tzitadinos e cantu imbeces custos matessi lis sunu depidores». Sa delibera presentà zobia colà non est istà torrà a zuchere a s’atentzione de sos revisores, tantu chi su parrere issoro est abarrau cussu a contariu de sos meses colaos. Galu su sindigu: «Puru si su parrere est contrariu, amus fatu totus sas cosas dimandas dae s’organu de controllu. Duncas su cussizu podet aprobare su documentu chentza peruna dificurtade». De parrere contariu s’opositzione, chi at accusau su sindigu e sa giunta de essere in ritardu de meses e pro su fatu de andare a fachere colare una delibera serende su parrere contariu de sos revisores. Tantu chi zuchene idea de signolare sa chistione a sa Regione, su ministeru de s’Economia, sa Corte dei Conti e fintzas a su tribunale
F.P.
© Tutti i diritti riservati
