Sos malavios cun su trapiantu pedini un ambulatoriu in Nugoro

Sos malavios de sa provincia chi sun’istetios operaos pro li ponnere un’organu nobu depene poder’achere sas bisitas de cuntrollu in s’ispidale de Nugoro.

Lu pedit su sotziu de Nugoro e de s’Otzastra chi achede parte de s’AITF, Associazione nazionale dei trapiantati di fegato. Sunu una novantina de pessones, chi in sos annos colaos sun’istetias operas pro lis ponnere renes, o icadu o coro novu, retziu dae pessones mortas o pro incidentes, in sas istradas, prus che ateru, o pro maledia. Su prus istana in sa provincia de Nugoro (chi dae carchi annu at torrau a ponnere a daintro puru s’Otzastra), ma findat puru calecunu de Terranova e de Aristanis. Su trapiantu l’est istau atu in Casteddu, in su “Brotzu”, chi est su solu ispidale cumpetente pro cussas operatziones.

A s’ispidale de Casteddu depene puru torrare pro achere sos controllos, nessi cada chimbe o ses meses. Primos idi belle cada mese. Ma puru cun custu cambiamentu in su tempus de sos atopos, sa cosa resurtada sempere prus de pesu e prena ‘e dificurtades.

L’achede presente Luigi Bellu, chi est su presidente de su sotziu (de sa zenia de sas onlus) liga a s’AITF: «Sos malavios sunu de su circondariu de Nugoro, ma fintzas de sa Baronia e de sa Gaddura. E, duncas, a s’ispostare de frequente a Casteddu non est fatzile. Ca ortras a su sacrifìtziu de sa carena, vat puru ispesas. Non sunu difatis in pacos chi pro achere sos controllos moene sa die prima dae sa bidda issoro e ghirana solo s’incras, pacandesi dae butzaca sa ispesas pro s’albergo e su manicu».

Resones chi ant’ispintu Bellu e sos ateros doghi cumponentes de su diretivu a pedire s’apertura in Nugoro de un’ambulatoriu prepostu pro cussas bisitas, in s’ispidale San Francesco: «Sa pratica est frima dae paritzos meses in sos ufitzios de s’azienda sanitaria, s’Ats, in Zazzari, chentza chi apamus apiu una risposta.

Sa bolontade pare chi non siat mala, cussiderau chi già l’ant fata presente su commissariu de cussa chi primos it s’ASL de Nugoro, Mario Palermo, e apustis Andrea Marras e Grazia Cattina, sos diretore de s’Assl, cussa chi operada como in su territoriu de sa provincia de Nugoro. Ma bisontzada de fachere impresses, ca cada die chi colada est a dannu e sos malavios, de chi at apiu su trapiantu».

In s’irvetu de sa detzisione de s’azienda sanitaria, sas dies colas de sa chistione at faeddau sa cussizera regionale Daniela Foma, chi at radichinas in sa provincia de Nugoro. Pacas paragulas, sas suas, pro atenticare chi b’est s’impignu de sa Regione (pro su tramite de s’ATS) pro apèrrere s’amulatoriu a benefitziu de chie at apiu su trapiantu de un’organu, a cominztare dae cussos chi campana cun d’unu icadu nobu. «S’azienda at già pubbricau s’avisu pro acatare un dottore de sa zenia mutia gastroenterologo – at ispigau sa cussizera de Borore – chi siat disponible a siche tramudare a s’ispidale de Nugoro».

Sos sotzios chi adirini a su grupu nazionale de s’Aitf, pro parte issoro, sunu puru impignaos a iformare sos tzitadinos in supra de su balore de su donu de sos organos, pro sarvare pessones chi non podene sighire a campare in sa situassione in sa cale s’acatana. Pro custa resone ispissu sunu presentes in sas iscolas, tra sos pitzinnos, atentos fintzas prus de sos mannos a custos temas. (f.p.)