NUGORO – Sa Comuna de sa tzitade capoluogo est a dainnantis de sos mamentos tra sos prus difitziles dae cando est comintzau s’impignu amministrativu, in su mese de lampadas de su 2015. A parte sa chistione de sa dimanda presentà dae s’opositzione de achere rughere dae s’ingarriga su presidente de su cussitzu, Fabrizio Beccu, vi sunu in custu mese de Santu Gavini de aprobare sos contos economicos chi atenene a sa cuntzada de su bilanciu 2017 e a s’esamene in supra de s’andamentu de cussos de s’annu ch’est currende, pro atzertare sos chi venini mutios “equilibri di bilancio”. Pro cust’urtimu su parrere de sos revisores de sos contos est’istau contrariu, mescamente ca non est’istà preventivau comente torrare una paja de depidos de oltras 3 miliones de euros e ca sa cassia durantes s’esamene (oramai atu dae prus de unu mese) ana nau ch’idi in suta de oltera sete miliones. Su sindigu Soddu dae deretu a garantiu chi sas mancantzias vocas a campu dae sos revisores ini totu fatziles de eliminare e in carchi casu, comente in cussu de sa cassia, sas diferentzias sunu naschias pro su vatu chi su dinare chi intrada a sa Comuna venidi marcau apustis de tempus in su contu de sa banca, in sa cale venidi acolliu su dinare de s’ente. S’istrobu non est però superau. Si n’dada a ischire de prus in sas dies imbenientes e mescamente su 29 de Santu Gavini, cando est convocau su cussitzu cumonale propriu pro porrogare, e votare, in supra de sas chistiones montovas. Sas dificurtades de Soddu sunu puru in su vatu chi sa maggiorantzia chi lu sustenidi est debile, apustis de sas cuntierras cun su partzidu sardu, chi a unu tzertu puntu a detzisu de non dare prus su sustenniu a su sindigu. Ca non est escrusu chi in su fratempus carc’ateru cussitzeri podede vennere a mancare, menscamente si su parrere de sos revisores abarrada contrariu. A parte s’opositzione in su cussitzu, ifadu e contrariedade a Soddu e a sa giunta arribana dae sa secreteria provinciale de su Pd, su Partizidu democraticu.
Su zudissiu est de Francesco Manca, vice-secretariu, chi non istaviada nesciuna critica ed’est cumbintu chi Soddu depada lassare s’ingarriga: «Sos contos non torrana e non pro su vatu de unu votu in prus o in mancu in sa maggiorantzia, ma ca su sindigu non est resurtau a mantennere unios sos grupos chi l’aviana sustenniu in su 2015». Ma non est totu, pro Manca: «Su male prus mannu est chi non b’ada prus una resone pro istare paris e sighire in s’amministratzione, cussiderau chi sunu mancaos sos resurtaos printzipales, tra sos cale cussu de su cuncursu de capitale italiana de sa cultura e s’ateru prò fradicare sa sede de s’universidade in su terrinu lassau liberu dae s’artiglieria».