Sos sardos bi tenent a sa salude e istant atentos a su chi màndigant. Lu narat s’ùrtima chirca de s’Osservatòriu de Reale Mutua in contu de su benèssere de sos tzitadinos. Dae custa chirca essit a campu chi su 78% de sos sardos faghet sèberos atentos cando est a pònnere in mesa s’ite de mandigare: su 32% controllat sos ingredientes e su 19% còmporat pro su prus produtos integrales e biològicos.
Su 59% màndigat frùtora e ortalìtzia meda e su 56% cundit su màndigu cun pagu sale. B’at finas unu 54% chi chircat de non consumare alcol e unu 28% chi màndigat paga petza.
Custa est sa nova bona. Sa nova mala est imbetzes chi su prus de sos sardos non faghent atividade fìsica o isportiva. B’at un’11% chi no est interessadu pro nudda, e àteros chi non tenent su tempus pro la praticare a fitianu.
© Tutti i diritti riservati