Nuoro, il nuraghe di Tanca Manna (foto S.Novellu)
Su Sole 24 Ore at fatu s’indàgine annuale sua pro bìdere sa calidade de sa bida in sas 110 provìntzias italianas. Pro cantu atenet a sa Sardigna, sa provìntzia in ue s’istat mègius est sa de Aristanis, a pustis benint Casteddu, Olbia-Tèmpiu, Nùgoro, Ogiastra, Tàtari, Campidanu de Mesu e a ùrtimu Carbònia-Igrèsias chi est sa nùmeru 101 in sa classìfica natzionale in ue tenet su primu postu Belluno e s’ùrtimu de totus Caserta.
Ite abbàidant pro fàghere custas classìficas? Sa richesa e cantu s’ispendet, ma finas su traballu, s’ambiente, sa seguresa, sa cultura.
Ocannu ant contadu finas cantu ispendet sa gente online, cantu ispendet in meighinas e cantos dibatimentos si bi faghet in sos tribunales.
In sas classìficas sìngulas, bidimus chi in Sardigna s’Ogiastra est sa prima pro richesa e consumos, sa Gaddura pro traballu e innovatzione, Casteddu pro ambiente e servìtzios, Aristanis pro sa seguresa (sa de tres in totu Itàlia).
Sos datos de su Sole 24 Ore, però, non torrant cun sos de sa chirca fata dae s’Universidade de Roma e publicada dae Italia Oggi. In custu istùdiu, difatis, est Nùgoro sa provìntzia in ue si bivet prus bene. A pustis benit s’Ogiastra, Tàtari, Aristanis, Casteddu, Carbònia-Igrèsias, Campidanu de Mesu.
Gianfranca Piras
© Tutti i diritti riservati