S’ammentu de s’opera custu bortaedie in sa bibblioteca “Satta”

NUGORO – Si tenede custu bortaedie, merculis 12 de Nadale, s’atopu de curtura prommore de su poete de Biddanova Monteleone, Remundu Piras. Amentu chi rughet in sos barantannos dae sa morte de Piras. Si tratada de unu tra sos poetes de prus balore, si non de su mentzus de totus, tra cussos chi cantavana in su parcu, imbentande in su mamentu, chi sa Sardigna at apiu in sos varios tempos. Sa cuferentzia est in sa bibblioteca “Satta”, a comintzare dae sas chimbe e mesa (ore 17,30). Tra sos interventos preventivaos, cussos de Francesco Fronteddu, chi at a faeddare de sa tradissione de sa poesia sarda, e de Giuseppe Molinu, chi at a dare su contributu a su tema presentande s’opera de Barore Tucconi, un’ateru de sos mannos de s’arte de sa poesia in Sardigna. At a essere presente puru Bernardo Zizi, oramai ritirau a bida privà, ma chi est reconnotu comente unu tras sos omines de prus balore in cuss’arte antica. Sa cuferentzia at a essere cuvrennà dae Gianluca Bardeglinu, zobanu de Orune, chi istudiat dae tempus sa poesia sarda e mescamente sa tradissione de su cantu a tenore. Prima de tratare de Remundu Piras e de su mundu de su cale est istau parte, cun sos contributos de sos cumpetentes apenas montovaos, sunu preventivaos sos saludos a su pùbbricu de su sindigu de Nugoro, Andrea Soddu, e de s’assessore de sa Curtura de sa Regione, Giuseppe Dessena. S’atopu de curtura de custu bortaedie est promoviu dae su sotziu “Santu Sidore”, de Orune, e dae su cussòrtziu de sa bibblioteca “Satta”.

(f.p.)

© Tutti i diritti riservati