Aviada pediu chi s’umanidade s’erede parte puru in galera
NUGORO – Sa comunidade de sa diocesi est in lutu pro sa morte de don Salvatore Bussu. Su preide, 90 annos, cun radichinas in Ollolai, sich’està andau in sa note de lunis in s’ispidale de Ozieri, inuve idi ricoverau dae carchi die ca meda suferente in sa salude. Oje, marculis 24 de Santu Gavini, sa missa pro s’urtimu saludu, nà a mantzanu in sa cattedrale “Santa Maria della Neve” e apustis in Ollolai, inuve est istau interrau, in su matessi campusantu inuve reposana sos familiares. Sos urtimos annos de vida don Bussu los ada colaos in s’ospitziu de Buddusò, bidda a lacana cun Bitzi, ma già in sa provincia de Zazzari. Sa salude difatis non li permitiada prus de attendere a sas netzessidade de cada die chenza s’atzudu de pessones cumpetentes e premurosas. Istavada bene, in su ricoveru, propriu pro custu tratu, mancari s’idea s’erede sempere cussa de si che torrare gara a Nugoro, tzitade inuve aviada abitau pro una parte bona de sa vida. Manna difatis sa tira pro sa bidda de naschida, Ollolai, ma puru pro Oliena, Bitzi, comunidades inuve aviada impignau una parte de s’opera de preide. In Nugoro, in sa cattedrale, est istau pro diversos annos canonicu de su Capitulo, cun s’ingrarriga distinta de penitentzieri. S’ateru impignu idi cussu de direttore de su giornale de sa cresia nugoresa, “L’Ortobene”, chi ad cuvrennau pro prus de 20 annos. Tempus in su cale sos abonaos sunu arribaos afurriu a deghemitza e su giornale ad’apiu ama manna, prò sos argumentos de interessu trataos e sas denuntzias contras a sas cosas atas male, in sa sotziedade, mundana e nono, e mesche in sa politica, ata propriu dae su direttore de “L’Ortobene”. Sa vida e su ministeru religiosu de don Bussu sunu istetios marcaos da un fatu sutzessu in sa galera de Badu ‘e Carros, in Nugoro, in su cale est’istau capellanu pro carch’annu, a comintzare dae su 1981, mandau dae su missegnore Giovanni Melis a su postu de don Giovanni Farris, chi s’idi dimitiu dae s’ingarriga. Badu ‘e Carros in cussos annos est catalogau dae su ministeru de sa Zustissia come “carcere di massima sicurezza” e pro custa resone acollidi tra sos presoneris prus periculosos, ispissu cun cundennas a s’ergastulu, siada prò su terrorismu politicu (de manca e de dresta) e siada de sa mafia, mescamente de cussa siciliana. Cando unu grupu ‘e terroristas proprio in sa casione de sa esta manna de Nadale, detzididi de torrare issecus su vitu ca su rigore e sa privatziones sunu mannas, Salvatore Bussu andada a s’al’issoro. Ata sa funtzione de Pasca, su manztanu, carch’ora apusti iscriede una litera a monsignor Melis, inuve lassada s’ingarriga de capellanu. A parrere suo su tratu de su ministeru contra a cussos presoneris non est zustu, siada ca in d’onzi casu sempere de cristianos si tratada, e siada ca sa leteze, e in cussu casu cussa de sas galeras, depede essere imprea pro achere a manera chi puru su cundennau potzada torrare a essere un’omine capassu de istare cun sas ateras pessones, in sa sotziedade, cun rispetu e serenidade. Totu custu, ada a fachere presente don Bussu, chentza che irmenticare lutos e astitzos, chi su maluachere de sos terroristas ada cumpriu. Ma s’istadu non si podede cumportare in sa matessi manera, ca tando colada dae sa resone a s’ala torta. Detzisione e paragulas, presentes in sa litera imbià a su missegnore, chi su guvernu in cussas dies non atzetada, puru ca su terrorismu e galu presente e sos lutos sunu galu vriscos. Su tempus chi sighidi ada a dare resone a su preide de Ollolai. Naschidi s’interessu in supra de sa chistione dae parte de su guvernu. Mescamente cun d’una letze, presentà dae su senadore de Firenze, Mario Gozzini, chi dada meritu e minimada sa pena a chie essende cundennau achede critica de sas aturas malas e s’impignada pro metzorare. Sos resurtaos de sa letze ana a essere de importu. Chentza sa denuntzia de don Salvatore Bussu sas cosas fortzis non in’ istas cambias galu pro diversu tempus.
Francesco Pirisi
© Tutti i diritti riservati
