A dies de oe sunt pagos sos adolescentes chi non tenent unu profilu in unu (o prus) social network: un’istùdiu de sos cumportamentos sotziales in Rete narat chi su 95% de sos pitzocos intre sos 15 e sos 18 annos est presente nessi in unu social network. Paret chi finas su 77,5% de sos pitzocos prus giòvanos (11-14 annos) siat presente in sos social, mancari b’apat lìmites de edade.
Custos datos sunt cunfirmados dae una chirca fata dae bator universidades (Cattolica de Milanu, Sapienza e Lumsa de Roma, Federico II de Napoli) incarrigadas dae sos Co.Re.Com de Lombardia, Lazio e Campania.
In su cunvegnu “Cyberbullismu e cumportamentu in Rete de sos giòvanos: unu biàgiu dae nord a sud” at essidu a campu chi su 57% de sos intervistados (1.500 istudiantes de Lombardia, Lazio e Campania) tenet unu profilu ‘privadu’, est a nàrrere chi podet publicare sena chi b’apat gente istràngia chi lu potzat bìdere. Su 40,3%, in prus, tenet unu profilu pùblicu e su 2,7% mancu si nd’ammentat, non nde tenet cussèntzia.
Ite pùblicant? Su 73% pùblicat sa fotografia de sa cara, su 72% fotografias e vìdeos personales, su 64,7% su sambenadu. Prus de su mesu ponet in cale iscola est istudiende, e b’at finas unu 19% chi pùblicat su nùmeru de telefoneddu e unu 9,1% chi ponet s’indiritzu de domo.
Sos perìgulos cales sunt? Su 27% de sos pitzocos narat chi in s’ùrtimu annu est istadu sugetu a formas de bullismu; su 20% at retzidu messàgios sessuales (sexting); su 5% s’est abigiadu chi l’aiant fatu unu profilu farsu; a su 13,6% lis ant postu in Rete (sena cunsensu) fotografias privadas.
Gianfranca Piras
© Tutti i diritti riservati
